終於回到香港，是次國泰旅程都 OK 既…雖然個電視有點問題，不過我睇到戲就唔理佢了，反正我有 NDS 可以打機。訓左三個鐘就醒左好精神，晌機上睇左極地雪犬、斷背山，然後打機打左好耐…

落左機，搭巴士去土瓜灣轉的士，返到屋企，終於親眼望到屋企門外起既新公園…呆左，超級極之UGLY 囉！然後望住自己間屋，差點唔認得，換晒不锈鋼欄杆，又係超級極之UGLY囉！

返到屋企，極之大塵，我間房又試俾阿媽當雜物房咁放滿晒野…算，我忍 =_=" 鼻敏感同氣管敏感既我，入到屋內不停打哈啾同咳到七彩，開窗吹都係一樣，d 塵已經痴晒晌牆呀…窗簾呀…等等，好難搞。入到房，仲要我清晒 d 老鼠屎呀，嚴蛇屎呀…蟑螂屎等等，勁係嘔心。

放低行李，冇耐就要趕出門口。去左灣仔等小米，出到軒尼斯度搵唔到吉野家 =_= 最後走左去食意粉屋。我地叫左個龍蝦套餐，幾好食不過係味精多左 d 同埋有點咸。墨魚汁意粉就見得多，墨魚汁飯就第一次食，可惜既係，我一望到個樣就諗起我頭先要清潔既野…反胃 =0=|||

小米送左生日禮物俾我呀，有 NICI 隻羊 !!! 我極愛 >3<~ 仲有長頸鹿電話繩~ 好得意呢！

因為等野食好耐，遲遲地到，食完就拿拿臨走了，行去會展。今日係「新城唱好陳慧琳演唱會」，有 KJ 做嘉賓嘛，咪去捧下場。Kelly 把聲厚左好多，聽唔慣所以感覺有點怪。整體黎講氣氛非常好，可以令人投入，只係我落機冇耐所以好累好累，到後記已經眼訓到就黎趴低。

因為唔想同成場既人迫，所以早左少少走，去到旺角雖然有點累，但唔係好想返屋企，突然諗起金比，就搵左佢出黎食甜品，好耐冇食過楊支金露！成半年唔晌香港，有好多野好想食 =_=" 食完之後傾陣計我就返屋企嚕，晌度多謝比比請我食野先 ^^~

終於完成左媽媽個網頁：http://www.masomui.com/
對美術有興趣既就睇下啦，歡迎各位參觀。

個網我都算係整得幾求其，記得幾年之前仲係好比心機咁花好多時間去整同管理自己個網，但係今時今日我已經冇心機去整一個「網頁」，連 Design 都毫無頭緒。

時代變了，而家網絡上所興既係 Blog、論壇等程式，我並唔係跟住潮流而改變，而係潮流令到好多呢 d 程式出現，仲一個比一個好，所以我都開始轉用左呢個 Blog 程式黎做我個網既主頁，可以隨時隨地搵一部有 IE 既電腦入到黎，的確方便好多。

近來太空閒，生活習慣變得極為混亂；日日朝早十點至十一點訓，晚上六點至七點起身…變成正式的「日夜顛倒」。不過就快返香港，而家較返正常時間，返到香港又亂過，咁不如唔較…

連續讀左咁多年書，突然讀完大學需要轉換環境，一時間覺得有點唔習慣。仲有唔夠一個星期就返香港，亦代表住即將要踏入社會工作，對於工作選擇、需要做既野，我將會遇到及需要面對既難題、挫敗等等等等…總覺得有點迷茫，亦有點怕自己到時候唔識點樣解決…另一方面卻又覺得好期待亦好緊張，因為我係一個非常喜歡轉換環境既人，比如搬屋咁樣，我會非常非常期待自己可以身處於不同既環境入面，然後慢慢享受適應既過程…心入面有點矛盾呢！

近排又開始有點唔舒服，醫生懷疑我偏頭痛，不過排得期去醫院檢查我都返左香港，所以叫我返到香港先再去睇醫生。呢幾日突然間個頭有一小部份劇痛，然後成個人會覺得空白左一秒又醒過來，每日會出現五六次呢個情況，而每個月亦會有四五日係咁，訓又訓得唔好，成日覺得個腦有野壓住壓住咁，好唔舒服…另一方面仲要氣管既毛病又開始翻發，突然間會覺得呼吸困難，好在我有帶備氣管藥旁身。

唉，身體好似越來越差了…

假若有天我突然消失於世界上，你或會想念，但不會找我吧！？你一直以為，把天空歸還、把籠子收起來，就能讓我得到快樂，卻沒想到這隻小鳥除了這個家以外已無處可歸。或許，你只是不想讓我感到失望，所以從來都不留下一點希望。這樣想，或會好過一點吧。

當時時刻刻記掛著一段已過去的感情，或者忘記了一段快樂的回憶，同樣是一件讓人感覺痛苦的事。你希望我得到快樂和幸福，所以希望我將你忘記；只是對於我來說，你就是我的快樂和幸福，要我把你忘記才是一件最痛苦的事。

每一段回憶，都能夠證明我曾經活過於你心中，證明我曾經開心過；我寧願把這一切一切烙印於心中，偶爾回憶、細味，都能帶給我一份暖意。請你不要要求我把你從腦海中完完整整的抽走，不要在我生命裡留下一片冷冰冰的空白。

我願意把天空還給你，但我不希望你把我忘記。當愛情與友情都已消失，我仍然希望記得起你。

今日 Send 左封 Email 俾爸爸，同佢講父親節快樂，佢話多謝我記得，然後講左一大輪唔關事既野，睇到最最最尾，佢寫 P.S. 18th June … 我諗左一陣，第一個反應係大叫左一聲「咦～～～～！？」哈哈，我好糯呀！好在我張父親節卡仲未寄出去 XD

是日葉子要出倫敦去教會有野做，咁我就跟埋出去搵媽媽。行到半路發現電話冇晒電熄左機，出左倫敦即係乜人都搵唔到點約人 =_= 所以中途折返歸家叉電…

變左分開出到倫敦，先搵媽媽，Hea 左一陣我就走左出去行下街嚕，順便幫阿媽買野。出到 Bond Street 見到有三個好似印度既人表演音樂，幾十樣唔同樂器放晒晌度一直換黎演奏，好正呀！唔經唔覺企晌度睇左一個鐘頭…

行行下…見到 d 大舖頭做咩落閘既？先醒起今日星期日乜都早關門，即係我乜都行唔到、買唔到，勁灰…就去左唐人街兜個轉買下野。等到葉子黎，原本諗住去剪頭髮點知間舖今日冇開…就行去左 Charing Cross，沿路經過白鴿廣場囉，原來咁容易黎 =_= 上次小米同 yan 黎旅行理應帶佢地黎行下，只係我唔識路…

再一次去左 T.G.I. Fridays 食野，佢個 T 骨牛扒同埋紅酒汁始終都係非常非常非常非常好食！近排佢地成日做 Promotion ，主菜買一送一好抵食 =P，揀左送個 Full Rack Jack Daniels Ribs 都好正！

去到 Kings Cross 趕火車，用左半分鐘時間由大牌下面跑到 11A 月台（平常以步行速度亦需時六分鐘左右），岩岩上到架火車就開出喇，好耐冇跑過咁快同咁耐，累死…返到去仲要行 40 分鐘返屋企，完全唔想郁…

是日出倫敦探媽媽，事前煲左碗靚湯同煮埋飯拎過去，碗湯阿媽勁鐘意飲，不過對 d 飯完全冇興趣 =_=" 最後變左我拎飯盒出去晌阿媽面前自己食…

下午幫阿媽打字，佢交功課要 Quote 好多書，有好多佢返到香港又有用，影印又太重拎唔到返去，Scan 又太煩太浪費空間，既然佢都係要打，咁就叫我幫佢將 d 書既某 d 段落打晒出黎。一萬五千字晌兩日內完成都咪話唔辛苦。

打到好夜，終於搞掂，近近地去左 Pizza Express 食。上次食 Victoria 果間麻麻地架咋，點知呢間野望落又 High Class 好多，野食食落又好食好多，仲有個非傳統式自創薄餅，清清地好新鮮好好味！

十點幾先走，跑呀跑趕到班火車，點知返到 Hatfield 發覺巴士要等五十五分鐘先有車，的士要等個半鐘…最後決定行返屋企，葉子仲要唔肯出黎接我 =3=" 行左四十分鐘先返到屋企，途中經過 Town Centre 仲要遇到好多飲醉酒鬧事既人，仲有勁多死飛仔，然後先發覺今日世界杯，一定好危險，自己一個行過真係好鬼死驚架！早知等車算了 =_=" 起碼晌火車站安全得多…