半年前晌 i010 Forum 入面搵唱功比較好既人幫我同朋友既作品錄音，搵左一個把聲幾好既女仔幫錄一首有兩個歌詞版本既歌。等左佢兩個月，終於有第一次錄既版本俾我聽。話俾佢知邊度唱錯音，邊度唱錯旋律，講左幾十次都仲可以錯，唱咁多次都唔覺得唔岩音既咩？後來因為同學要寄出 Demo，所以問佢介唔介意錄個 Pro 少少既版本，佢應承左，但係又再等左一個月先有所謂既「完整版」出左黎，之前叫佢改既唱錯音冇改到，旋律照舊唱錯；見佢某幾段唱得有感情 d 放 d 激 d …都係由頭到尾好似讀出黎咁淨「唱」，見唔係太過份就算了，我已經冇心機再講多幾次。

不過，呢個版本有好幾句都走音同埋有幾個位旋律錯到後面果句太趕，叫佢改但最後呢？等左三個月又再冇左回覆。三個月後既今日問下佢隻歌點，佢話我地洗唔洗要求咁高，仲要話「走音咋嘛」、「少少旋律錯咋嘛」…我要求人地幫忙，旋律錯我都可以由佢；但以一個唱歌既人黎講，唔走音係一個基本既要求！我提醒過佢既野，佢唔改都算，我亦都講過一兩次就唔迫佢再錄。請人幫忙我唔想催人，就咁就過左半年，最後都係得個吉！今日問佢錄音既野，佢就話病左四個月，聽佢話咳聽左四個月，話感冒未清都聽左四個月，但係呢四個月以黎晌 Forum 仲不斷見到佢錄歌 Post 歌…仲要講到自己錄音同唱歌經驗好多，俾意見人地時話人走音…有資格咁講咩！？唉，對呢個人完全心淡…

一直都周圍聽唔同人自己錄音放出黎既歌，聲靚、唱功好，唔屬於任何公司而又肯幫人錄歌既人已經淨返好少，為左搵人錄歌而煩惱左好一段時間。母親節搵左人錄隻歌俾媽媽，在此再一次多謝 Matsu 幫唱。呢次好輕鬆，講兩句佢就對 d 音同旋律就清楚明白晒，唔洗我再激氣。近排晌 Cmidi 都搵左個人幫我錄歌，佢把聲都幾靚，希望今次唔會失望啦。

無意中晌 Sooff 聽左個叫 KarKar* 既人唱既歌，佢把聲好正，如果佢會演繹我既歌就好嚕。

上次份 Sound Design Project – Crashes 出左分嚕，總算做得幾好，Rob Godman 仲話我揀 Sound Effect 揀得好好，話我好仔細將 d 畫面有既動作既聲音都放左入去，不過問我點解唔整背景音樂囉 =_= 呢個 Project 佢俾左一星期我地做，仲要份 Briefing Sheet 指到明 d 分點計係睇係聲效同動作既時間配合、有冇表現出不同既環境及方向，Well…咁樣鬼會諗到用背景音樂咩 =_=！？仲要話 Why not present it … 明明係 Optional 既，我果日又唔得閒，仲要我已經撞過佢解釋過，寫黎好無謂 =_=||||||

Jo 再一次問我星期一晚同學聚會去唔去，我一向都唔鐘意 Social 架啦，仲要同佢地鬥假…我仲係心大心細掭…不過 Valerie 同 Chrysi 都唔去，睇黎我都係唔去居多嚕…唉，一班咁假既同學仔，見唔見都罷。

買左冇耐既 The Rub Rabbits，前幾日已經將 Normal / Hard / Hell / Heaven 全部打爆晒，今日連 Memories 入面既所有關卡（Disc 同 Love Bombers 由第一玩到第十我冇心機玩除外 XD）玩到滿分…又俾我玩完，悶死我喇！

近來好冇野做，忙碌既時候好想寫歌但係冇時間；到左而家有時間，坐晌度諗住寫歌既時候 d 靈感就唔知飛晒去邊。無無聊聊咁寫左幾隻歌仔玩下，不過都係冇心機既求其之作…海藍呀海藍，咁樣落去唔得架 =口="

今日一起身，見到檯頭有隻紫色貓頭鷹公仔，仲有張生日咭同鎖匙扣。我真係好蠢咁被葉子呃左，以為佢諗唔到送乜俾我而冇買。張生日咭入面寫既野…好 Touching ，但同時亦有點心痛。

葉子，謝謝你。

唔經唔覺就廿二歲嚕，踏入新的一年，我希望…可以一日比一日進步，咩方面都好啦。

下午返學校繼續聽 Concert，今日係 Dominic Alldis 既 Jazz Piano，佢唱得好好聽，彈琴都好好。佢以唔同於其他人既演繹方法去表演每一首出名既歌曲，另有一番風味。佢而家仲做緊個 Project 就係將唔同既 Nursery Rhymes 以 Jazz 演繹出黎，真係好正，佩服佩服。

返到屋企，上網同屋企人傾開近來既事。當我同朋友、同學等分析既時候，最相信我既反而係佢地。屋企人？媽媽聽晒阿哥一面之詞，每一次都冇問過我就當正乜都係我錯。屈我既，唔信我既，竟然係我最親既人…我相信我係第一次晌我生日既日子唔開心到喊… What a birthday present !?

夜晚去左睇 Final Year Concert，所有 Final Year Project 選擇做作曲既同學仔都要寫份俾 Choir 唱既歌，我揀做一萬字論文所以唔洗做，但係今日去捧 Valerie 場。裡面有好多 Idea 都好好，只係我唔鐘意 Soprano 太高音，唱得好難得（純粹個人感覺唔鐘意 XD 唔係話佢地唔好）

原本今日我同 Ian 同 Valerie 出去食飯架，不過佢地鬧左成日交，最後都係返左屋企煮飯。過左一陣 Ian 話煮埋俾我食~ 因為我生日~ 所以我唔客氣嚕！

今日返學睇 Piano with Experimental Electronics ，勁唔想見到 Philip Mead 囉！今日佢表演 d 我地同學仔作既功課，完全估唔到 Polly 做得好好 @_@

睇完表演，同 Valerie 出左 Galleria 既 Fatty Arbuckles 食飯，佢請我食生日大餐。個女侍應態度極差囉！仲要叫左個古古力奶昔，陣味似牛奶加水！叫另外個男人換過杯，佢黎到既時候放低話「你而家試試先，裡面有朱古力雪糕架喎，實有少少古古力味」咁講即係覺得我話冇味無理取鬧喇喎！？不過第二杯的確濃少少既，但係佢裡面既野飲同野食真係越來越差喇，好失望；下次都係落樓下食 Frankie & Bennys 好了，係貴少少但好食好多，又唔洗受氣，服務又好…

不過，我最鐘意食既 Barbecue Ribs…始終都係 Fatty Arbuckles 整得最好食 =3=

今日 Mayfest 開始嚕，音樂節第一日有 Philharmonic at UH。好多同學都以為係夜晚開始所以冇去，我唯有一個人行左落 De Havilland 個 Weston Auditorium 度睇。今日呢個係 Compulsary 嘛，唔去好似唔係幾好。

是日節目包括：
GEMINI CONCERTO by Timothy Blinko with the Cann Twins (Piano Duet)
ALTERNATE PERSPECTIVES by Howard Burrell
FIREBIRD SUITE by Igor Stravinsky

Tim 作既 Gemini Concerto 其實第一年黎讀既時候已經去捧過佢場聽過（因為佢係我阿 Sir ^^"），今日再聽覺得更加鐘意，好 Dramatic 同埋好有感情 @_@ 唔知有冇出碟呢？真係好想買。

Howard 作果首個都好得 @.@ 幾鐘意佢無啦啦晌音樂中間出現 Jazz 既部份，可惜係我嫌佢太悶，Structure 冇乜高低起跌啦！

Stravinsky 咁出名既音樂家，佢呢隻歌我已經聽左好多次唔同人演奏既版本，是次覺得佢地演奏得唔係幾好，仲有 Brass Instruments 成 Part 係咁走晒音，仲要大聲到爆咪，失敗。

三隻歌就聽左成兩個幾鐘呀，不過今次覺得時間都過得幾快。返屋企時落勁大雨囉，著住褸笠埋帽再開埋遮都冇用，返到屋企全身濕晒 =.="