終於將一月裡面多份功課完成，日子突然空閒了許多。不過，我只可以容許自己休息返幾日，跟住又要搏殺過。為左四月米米同阿 Yan 黎英國一齊去玩，我要晌四月之前做完份 Final Year Project，期間仲會有好多唔同既小功課黎緊，大學 Final Year 既忙碌現今我完全體會到了，不過都仲係未及中五同中七會考果陣時咁大壓力。

有好多時候，俾人問點解我會讀音樂，到底我係唔係鐘意音樂？每一次遇到呢個問題，心入面總係有少少覺得自己唔可以講話我好鐘意咁…但係呢幾日可以休息返一陣既時間，我全部用晒黎作曲，編曲，填詞，甚至天光上床訓，都周身唔自在咁碌下碌下訓唔著，最後都係走落床繼續整隻歌…突然諗起我以前樂理老師既一句說話：「你想知自己係唔係真正鐘意做一樣野，你諗下自己通常連覺都唔訓，捱辛苦都會做既有乜野？」諗一諗，我可以數出既係寫歌、填詞、打機、整網頁。

或者七年幾以來，做音樂已經成為左我既習慣，所以我已經感覺到自己對音樂已經唔係鐘唔鐘意或者愛唔愛音樂既問題，因為音樂對我黎講已經係一個必須品。

所以你問我係咪好鐘意音樂咩？我真係唔識答你。不過我會話：「音樂係我既生命」

一直俾人問我，完成左大學課程之後，將會搵一份咩工做？我唔知。向來都唔鐘意將自己喜歡既野同工作拉上關係，因為責任感，煩惱催促感會令我對任何一樣野失去興趣。我鐘意寫歌寫詞，我唔希望自己討厭左呢樣野，所以唔想自己既主要工作同作曲填詞有關。當然，作曲填詞亦會為我帶來收入，但係我希望留返一條路俾自己，當我想寫野既時候先去做一首作品出黎，而唔係為左錢而迫自己機械式倒模一隻歌出黎。始終我希望：一首音樂，雖然好唔好聽係好主觀，但只要係用心黎做既，就係最好既。

話晒晌大學讀完音樂，出到黎做同音樂無關既野好似好怪，況且如果要做其他野既話，當初我讀音樂學位黎做乜？好在我都希望自己既工作同音樂都有一個連繫同關係晌度。但係我都係諗唔到做乜好…

我明白音樂工作呢個範圍內，要人地請你入去做野，好需要人際關係同埋好多不同方面既經驗。我一直以黎都諗住由低做起，唔好話人工住啦，我真係好希望可以識多好多做緊唔同音樂範疇既野既人，亦都想學好多好多野，加深自己既經驗。不過，似乎屋企人唔係咁諗。由《他約我去迪士尼》歌曲被人廣泛認識開始，身邊既家人同親戚一直問我想做乜，每次同佢地講親我想點，佢地就不斷同我講，係都去大公司度做野…我覺得入大公司有大公司既好，細亦有佢既好；只係睇下我自己想做既係乜，同埋適合我去做既係乜。況且，雖然我讀完個音樂學位，但係我呢個不過係作曲同電子錄音等技巧既課程，同音樂市場或管理既無關。個個都諗住我出到黎一定入到去做野咁，晌我完全冇經驗底下，要我入大公司做根本就冇可能。

雖然佢地出發點都係希望我搵到一份好既工作，得到一份穩定良好既收入。不過，有時我真係希望佢地顧及一下我點諗，聽下我想做咩，同埋我覺得咩野適合我去做。我自己都有諗過入佢地認為係大公司既地方做野，不過唔係而家囉，出去周圍學下野先唔好咩？咁最終入大公司做果陣做錯既野都會少好多。

我最終想做既工作（即係諗住一路做好多年果隻），我而家仲未諗到…不過我諗自己會定一年既摸索期俾我嘗試下唔同既野，再去搵下到底自己適合做乜類型既工作。成全我，可以嗎？

雖然付出過幾多，未必能夠得到一樣多；不過付出得越多，得到的一定越多。

付出，就正如失去了那些用來努力爭取的時間；
所謂有得必有失，要換來某些東西或事物之前，必要放低很多。

有些事物，我為它付出過、爭取過；慶幸地，我現在滿足於我所得到的。
然而，還有太多想要的東西，因為我捨不得放低一些事，而永遠也得不到、辦不到。

原來，付出不止需要努力和決心，還需要很大的勇氣來作出選擇取捨。

如果前面有兩條路讓你選擇，盡頭放著的都是你希望得到的東西，
而它們在你心中有著相同的地位，但得到它們的同時，你將會失去一些同等重要的東西。
那麼，你又會選擇何者？

SWEET DREAMER

作曲：KellyJackie
填詞：海藍 Joanna
編曲：KellyJackie

Audio clip: Adobe Flash Player (version 9 or above) is required to play this audio clip. Download the latest version here. You also need to have JavaScript enabled in your browser.

夏季中美夢　凝望天空中片雲漸紅　結伴到夜空　再伴柔和清風吹送
望雨點輕輕的降臨後　七色繪上白晝　同攜著手　暖意　對你輕奏

＃前面遍山青草　用這腳步　到遠海雲霧
　尋覓永生不老　幸福國度　到某一天　若可兌現　多麼美好＃

＊雲上任意飛　沿途也會記起　沉迷著薰衣草醉意香氣
　如同坐客機　同遊數千世紀　也抱緊你　身影倆嬉戲
　一起走到最尾　每秒都細味　從夢境中親你　在今生今世亦希冀＊

今年 Final Year Project 之一，就係一個音樂劇，要寫一首用 Steel Pans 打既歌，仲要俾班細路仔唱。我同 Valerie 兩個夾份做既。今日神早九點搭車去左 Stevenage 一間幼稚園 + 小學度搵 d 小朋友練習。

去到之後，首先佢地唱歌俾我地聽，之後我地 Music Department 個 Professor Howard 教佢地讀我地同學作果 d 歌詞，同埋教佢地唱歌。之後分組！我地 19 個人每人要帶 5 ~ 6 個小朋友。Valerie 好慘呀，佢果組有個細路女由頭喊到落尾，話好掛住媽咪，又話好驚唔知我地而家做緊乜… tum 左佢好耐都搞佢唔掂…

幸運地我幾鐘意我果組 d 小朋友。裡面有六個細路，兩個一年級、兩個二年級、一個三年級、一個四年級。下星期仲要搵返佢地架！襯我仲記得，晌度記低佢地 d 名先：佢地係 Raza、Liam、Lily、Charlie、David、Charlie。裡面有兩個小朋友有少少過份活躍，不過都好過有一個全程我點同佢講野佢都唔出聲…

分組喇！我要教佢地讀字同唱歌仔。我話我讀多一次，佢地下次要讀返俾我聽架！跟住個細路女話：「得喇我背俾你聽啦，神早就記得晒啦，唔洗讀多次」我啞左，冇野好講…不過其他細路都唔係好記得呀，歌詞逐句黎就冇問題，但係佢地串連唔到。咁我就同佢地做畫劇喇，點知成班男仔爭住扮演馬騮，我唯有叫佢地包剪鎚話事。做完畫劇，佢地記得晒故事流程，自然就記得晒 d 歌詞邊句打邊句，呵呵。

之後佢地唱得好好呀！有個好鐘意認叻既小朋友，佢話佢自己好醒呀，記得晒點唱。當然呢個時候我都有讚佢啦，不過跟住順口地話，咁你夠唔夠叻到可以教到你 d 朋友仔呀？我又奈佢唔何喎，佢走去教果個唔出聲唔應我既細路，又真係得喎！最後一齊唱多次，全組小朋友都有唱！

講真… kee kee 都幾有滿足感架！